ْمازال الصندوق الاسود لقصر الرئاسة مليئا بالاسرار والخبايا التي لاتنتهي وحديثنا مع اللواء شفيق البنا قائم علي كشف تلك الاسرار التي كانت بعيدة كل البعد عن المصريين، في هذه المرة نكشف كواليس ثورة 25 يناير واسرار جديدة عمن وصفهم بسحرة فرعون وهامان الرئاسة وقارون مصر فإلي تفاصيل الحوار:
> بالنسبة لاحداث ثورة 25 يناير عندك معلومات عن الكواليس؟
ـ اللي اعرفه أن حبيب العادلي بعد الثورة بيومين اقترح علي الرئيس مبارك تعيين جمال نائب رئيس جمهورية وتفويضه بصلاحيات الرئيس واترك انت السلطة الا أن أوباما رفض بعد أن راجعه مبارك لان مبارك في علاقته بأمريكا واسرائيل يعلم أن الرئيس الذي سيخلفه في عهده لابد أن يكون مرضي عليه من قبلهما وطبعا عمر مبارك ولا ابنه جمال كان واضع في حسبانه أن فيه شعب اسمه الشعب المصري لان حبيب العادلي كان مفهمهم أن الشعب في قبضته.
انت فاكر لما وزير الداخلية اعلن في احتفالات عيد الشرطة الاخيرة أن مرتكبي حادث كنيسة القديسين بالاسكندرية وراءه الجيش الاسلامي الفلسطيني.. دا كان بداية الطريق للقضاء علي الاسلاميين في مصر.
> تفتكر الرئيس مصيره ايه؟
ـ لو اسرائيل ما عرفتش تتصرف يبقي النهاية هي الاعدام ولعلمك اولاد العادلي عارفين انه ميت ومبارك الآن يعيش في رعب.
> اكيد شاهدت خطاباته اثناء الثورة تفتكر انه كان صادق في كلامه؟
ـ دا راجل كداب يقولك اما الاستقرار واما الفوضي اما انا واما هحرق لكم مصر زي نيرون وانا فهمت ده من كلامه.
> طب وبالنسبة لخطاب التنحي اللي قاله عمر سليمان؟
ـ مين قال انه تنحي... اللي حصل إن القوات المسلحة رفضت تنفيذ خطة ارادة في المتظاهرين وهو لما راح غرفة عمليات القوات المسلحة راح يوقع علي تنفيذ الخطة.
> يعني ايه خطة " إرادة "؟
ـ هي مقاومة الشغب الداخلي عن طريق القوات الجوية.
> وإيه اللي حصل بعد كده؟
ـ القوات المسلحة رفضت حتي المشير لما نزل التحرير وجد الدبابات مكتوب عليها يسقط مبارك وفيه دبابات خرجت من مكانها وهي مكتوب عليها والمشير لما قابل الضباط الصغيرين في التحرير سأل واحد منهم وهو ملازم مسيحي من الصعيد لو جاتك تعليمات تضرب المتظاهرين بالنار حتعمل ايه؟
ـ فالضابط قاله انا اقلع السترة واضرب اللي يقولي كده بالنار وفي النهاية اتفق المجلس العسكري علي عدم تنفيذ تعليمات مبارك لان المقارنة بين بقائه في الكرسي وابادة 3 ملايين مصري.. الجيش عمره ما عمل كده وبعد أن علم مبارك اتصل بالمشير وفضل يشتم ويقول انتوا بتخونوني ولم يكن امام مبارك سوي الحرس الجمهوري وعندما زاد مبارك في كلامه صدرت التعليمات بتحويل ابراج الدبابات ناحية القصر حتي يحترم نفسه.
وكان يوما عصيبا علي اسرة مبارك فيه ناس بتعيط من الحرس وجمال وعلاء اتخانقوا وسوزان بتبكي وكانت محزنة والرئيس قال هو طنطاوي مش عاوز البلد يبقي يشيلها وانا حخليها خرابة.. المشير النخوة العسكرية منعته ان يؤذي القائد بتاعه او يرد عليه و تم نقله في طائرة لشرم الشيخ ووفر له كل متطلباته من حراسة وسكرتارية وطباخين والكلاب حتي الحلاق محمود لبيب كان بيبعتهوله وفوجئوا بأن مبارك فضل يشتم قدام محمود لبيب فالمشير اتصل بيه وقاله لو عاوز تقعد تقعد بكرامتك وما تجبش سيرة مصر علي لسانك.
> هما اتأخروا في القبض عليه ليه؟
ـ والله اللي حصل أن جمال كان علي اتصال بالموساد الاسرائيلي لتدبير عملية تهريب الاسرة خارج مصر باستخدام قوات اسرائيلية وتم تسجيل هذه الاتفاقات بعدها صدرت التعليمات ببدء المحاكمة وسحب كل الامتيازات حتي الدكاترة بطلوا يروحوا وتحول الي مواطن عادي ومن يومها يعيش في حالة رعب وهلع وذعر شديد لدرجة أن اغلب الفترة التي قضاها في المستشفي كان تحت تأثير المنومات لان اعصابه انهارت لدرجة انه طلب ازالة الحوائط الالوميتال التي في غرفته وكان يصرخ انتوا حبستوني شيلوا الحديد اللي حواليا.. ايه اللي بيحصل انا حموت وتم فك بعض الحوائط حتي يهدأ.
والصدمة الحقيقية عند مثوله أمام النيابة العامة وسئل: اسمك وسنك ومهنتك؟
ففزع وقال انت مش عارف انت بتكلم مين انا رئيس الجمهورية فرد عليه وكيل النيابة انت رئيس جمهورية سابق ولما اسألك تجاوب انت مواطن مصري عادي اقعد قدامي ورد عليا.
> مافكرتش تزوره او تزور اولاده؟
ـ انا بصراحة فكرت اروح لكن انا عارف أن زيارتي حتتفسر غلط ويقولوا اني جاي اشمت فيهم اول حاجة حيفتكر المصايب اللي حاول يرميني فيها هو ورجالته
ليست هناك تعليقات:
إرسال تعليق